လါယနူၤအါရံၤ - SAC ခးလီၤကျိဖးဒိၣ်ဒီးဘၣ်ဒိပှၤသးစၢ် (၂) ဂၤဖဲ ခရွဲကရူၢ်
ဖဲလါယနူၤအါရံၤ ၁၆ သီ, ၂၀၂၄ နံၣ်အနံၤ, ဟါခီ ၆း၃၀ အဆၢကတီၢ်, ထံကီၢ်တၢ်ပၢတၢ်ပြးကီၣ်ကးကရၢ (SAC) စုကဝဲၤဒိၣ် (အမတ) (နီၣ်ဂံၢ်- ၃၁၀) လၢအအိၣ်ဖဲခီၣ်ချ့သုးတြိၤ (တမ-LID) (နီၣ်ဂံၢ်- ၄၄) တၢ်ပၢအဖီလာ်ဒီးအိၣ်ဆီလီၤအသးဖဲသ့းစရဲၣ် (သိမ်ဇရက်)ဝ့ၢ်, ကၠဲၣ်ထိၤကီၢ်ဆၣ်တဖၣ်ခးလီၤကျိဖးဒိၣ် ၆၀ မမ (၃) ဖျၢၣ်ဖဲအအ---သဝီ, ခရွဲကရူၢ်ဒီးကျိဖးဒိၣ်ခံဖျၢၣ်လီၤတဲာ် ပိၢ်ဖးထီၣ်ဖဲသဝီပူၤန့ၣ်လီၤ. [ကျိဖးဒိၣ်အလီၢ်ခံကတၢၢ်တဖျၢၣ်လီၤတဲာ်ပိၢ်ဖးထီၣ်ဝဲဖဲသဝီချၢန့ၣ်လီၤ]. ကျိဖးဒိၣ်အကျါတဖျၢၣ် လီၤတဲာ်ဖဲ ကိၤအ--- ဟံၣ်ကရၢၢ်ပူၤ ဒီးဘၣ်ဒိဝဲတီၤတဆံကၠိဖိလၢအမ့ၢ် မီၤဘ---, သးနံၣ်အိၣ်ဝဲ (၁၇) နံၣ်ဒီးဘၣ်ဒိဖဲအကံၣ်ဒုၣ် လၢအစ့ၣ်တကပၤန့ၣ်လီၤ. ကျိဖးဒိၣ်အံၤဘၣ်ဒိစ့ၢ်ကီး မီၤဆ--- လၢအသးနံၣ်အိၣ်ဝဲ (၁၉) နံၣ်ဒီးဘၣ်ဒိဝဲဖဲအချၢဃံန့ၣ်လီၤ. ပှၤသးစၢ် (၂) ဂၤအံၤဘၣ်ဒိဝဲဖဲအဝဲသ့ၣ်ဟဲက့ၤကဒါက့ၤဆူအဟံၣ်အဆၢကတီၢ် ဒီးဖီၣ်လိာ်အဖံဘၣ်ခိၣ်ဃုာ်ဒီးအသကိးလၢအ မ့ၢ်သုးဖီၣ်စုကဝဲၤန့ၣ်လီၤ. အဝဲသ့ၣ်ဘၣ်တၢ်လဲၤဆှၢအီၤဆူတၢ်ဟ့ၣ်ကသံၣ်ဒၢးလၢအဘူးဖဲန့ၢ် ဒီးဒိးန့ၢ်ဘၣ်ဝဲအတၢ်ကူစါယါဘျါဖဲ (CDM) ဆူၣ်ချ့ပှၤမၤတၢ်ဖိအအိၣ်န့ၣ်လီၤ. လၢခံတနံၤအဝဲသ့ၣ်ဘၣ်တၢ်လဲၤဆှၢအီၤဆူတၢ်ဆါဟံၣ်လၢအအိၣ်ဖဲသ့ၤစရဲၣ် (သိမ်ဇရက်) ဝ့ၢ်, ဘၣ်တၢ်တီခိၣ်ရိၤမဲအီၤလၢ SAC ဒ်သိးကဒိးန့ၢ်ဘၣ်အါထီၣ်တၢ်ကူစါယါဘျါန့ၣ်လီၤ. ပှၤတူၢ်ဘၣ်တၢ်ဖိအံၤလၢ တၢ်ကူစါယါဘျါသးအတၢ်လၢာ်ဘူၣ်လၢာ်စ့ၤအဂီၢ်အဝဲထဲးဂံၢ်ထဲးဘါဝဲတန့ၢ်ဘၣ် ခီဖျိအိၣ်ဒီးတၢ်လုၢ်အီၣ်နီၢ်ခိသးသမူတၢ်ကီတၢ်ခဲ သ့ၣ်တဖၣ်န့ၣ်လီၤ. ကျိဖးဒိခံဖျၢၣ်တဖျၢၣ်လီၤတဲာ်ဖဲသဝီပူၤဘၣ်ဆၣ်တဒုးအိၣ်ထီၣ်တၢ်ဘၣ်ဒိဘၣ်ထံးနီတမံၤဘၣ်န့ၣ်လီၤ.
လါဖ့ၤဘြူၤအါရံၤ - SAC ဒြိခးလီၤတၢ်ဒီး ဒုးအိၣ်ထီၣ်ဝဲတၢ်ဘၣ်ဒိဘၣ်ထံး ဒီးတၢ်ဟးဂုာ်ဟးဂီၤဖဲ ခရွဲကရူၢ်
ဖဲလါဖ့ၤဘြူၤအါရံၤ ၁၇ သီ, ၂၀၂၄ နံၣ်အနံၤ, မုၢ်ထူၣ် ၁၂း၀၀ အဆၢကတီၢ်, SAC သုးဖိလၢအအိၣ်ဆီလီၤအသးဖဲ အဒ---သဝီ, ဝီကီၢ်ဆၣ်, ပကိကီၢ်ခီသ့ၣ်တဖၣ်ဟဲကွံာ်လီၤတၢ်ဒီးဒြိတဘ့ၣ်ဖဲ အဘ--- သဝီ, ခရွဲကရူၢ်, ကၠဲၣ်ထိၤကီၢ်ဆၣ်ပူၤန့ၣ်လီၤ. ဒြိအံၤဟဲ တ့ၢ်လီၤဝဲမ့ၣ်ပိၢ် (၂) ဖျၢၣ်ဒီးလီၤတဲာ်ဘၣ်သဝီဖိလၢအမံၤမ့ၢ် ဒီၤဒ--- ဒီး ကိၤဒ--- အဟံၣ်န့ၣ်လီၤ. မ့ၣ်ပိၢ်အံၤပိၢ်ဖးထီၣ်ဒီးအက့အံၤ ဘၣ်ဒိဝဲအဖိမုၣ်လၢအမံၤမ့ၢ် မဃ---, သးနံၣ်အိၣ်ဝဲ (၁၈) နံၣ်ဒီးဘၣ်ဒိဝဲဖဲအခိၣ်သၣ်ဃံဒီးအခၣ်န့ၣ်လီၤ. ဟံၣ်ခိၣ်ဒုးဒီးဟံၣ် တၢ်ပီးတၢ်လီသ့ၣ်တဖၣ်ဘၣ်ဟးဂီၤစ့ၢ်ကီးဝဲဒၣ်န့ၣ်လီၤ.
တၢ်တနၤန့ၣ်, ဖဲ ၁၂း၄၀ အဆၢကတီၢ်, ဒြိဟဲတ့ၢ်လီၤမ့ၣ်ပိၢ်အဆိကတၢၢ်တဖျၢၣ်အံၤ လီၤတဲာ်ဘၣ်ဝဲဖဲ ဒီၤဒ---အဟံၣ်ဒီး ဘၣ်ဒိဝဲအဖိမုၣ် မၣ်ဃ--- န့ၣ်လီၤ. စှၤမံးနံးဝံၤအလီၢ်ခံ, SAC သုးဖိလၢအအိၣ်ဖဲ အဒ--- သဝီတဖၣ်ခးလီၤကျိဖးဒိၣ် ၁၂၀ မမ န့ၣ်လီၤ. တကတီၢ်ဃီ ဒြိတဘ့ၣ်ဟဲတ့ၢ်လီၤကဒီးမ့ၣ်ပိၢ်အသီတဖျၢၣ်ဖဲ ဒီၤဒ--- အဟံၣ်ခံဘျီတဘျီန့ၣ်လီၤ. [လီၢ်ကဝီၤသဝီဖိ တဖၣ်တသ့ၣ်ညါဝဲလၢ မ့ၢ်ဘၣ်မနုၤအဃိ SAC ပ ညိၣ်ထီဒါဝဲသဝီဖိအံၤအဟံၣ်လဲၣ်ဘၣ်]. မၣ်ဃ--- အံၤဘၣ်တၢ်လဲၤဆှၢအီၤဖဲ တၢ်ဆါဟံၣ် လၢအဘူးလၢအဘၣ်တၢ်ဒုးအိၣ်ထီၣ်အီၤလၢလီၢ်ကဝီၤခီၣ်တဃာ်ဆူၣ်ချ့ပှၤမၤတၢ်ဖိန့ၣ်လီၤ. မၣ်ဃ--- ဒိးန့ၢ်ဘၣ်ဝဲ တၢ်ကူစါယါဘျါ (၃) သီဝံၤ စံၣ်လီၤတၢ်ဆါဟံၣ်ဒီး (၄) သီတသီဟဲက့ၤကဒါက့ၤဆူအဟံၣ်န့ၣ်လီၤ.
ညအ--- ထံကျိအံၤမ့ၢ်ဝဲထံကျိထဲတဘိလၢအအိၣ်ဖဲ အဒ--- သဝီဒီး, အဘ--- သဝီအဘၢၣ်စၢၤ, ခရွဲကရူၢ်ဒီးညီနုာ်တၢ်ခးလီၤဝဲ ကျိ ဒီးကျိဖးဒိၣ်ဖဲ အဘ--- သဝီပူၤန့ၣ်လီၤ. တနံၤဃီဖဲ လါဖ့ၤဘြူၤအါရံၤ ၁၇ သီ, ၂၀၂၄ နံၣ်အနံၤ, ဂီၤခီ ၉း၀၀ အဆၢကတီၢ်, SAC သုးဖိလၢအအိၣ်ဖဲ အဒ--- သဝီ, ဝီကီၢ်ဆၣ်အပူၤအံၤခးလီၤစ့ၢ်ကီးကျိဖးဒိၣ် ဒီးကျိဖးဒိၣ်တဖျၢၣ်လီၤတဲာ်ဝဲဖဲ အဘ---သဝီပူၤဖဲ ကိၤထ--- အဒီပုၢ်ဝဲၢ်မုၣ်လၢအမံၤမ့ၢ် ဒီၤဟ--- တဂၤအကရၢၢ်ပူၤန့ၣ်လီၤ. ကျိဖးဒိၣ်အံၤဘၣ်ဟးဂီၤဝဲ ပဲတြီမဲာ်ထံကလၤ ဒီးဟံၣ်ဒူၣ်ကပၤန့ၣ်လီၤ.
ကျိဖးဒိၣ် ၆၀ မမ တဖျၢၣ်လီၤတဲာ်ဖဲ ကိၤဂ--- အဟံၣ်ကရၢၢ်ပူၤ ဘူးဒီး ကိၤထ--- အဟံၣ်န့ၣ်လီၤ. ကျိဖးဒိၣ်လၢ SAC ခးလီၤအံၤ အက့ဖျိးဒီးဘၣ်ဟးဂီၤဝဲဟံၣ် (၃) ဖျၢၣ်တဒိၣ်တဆံးဒီး ဆီတဘ့ၣ်ဘၣ်သံကွံာ်ဝဲန့ၣ်လီၤ. ဟံၣ်(၃) ဖျၢၣ်အံၤအကစၢ်မ့ၢ်ဝဲ ဒီၤဟ---, အူဧ---, ဒီးကိၤထ--- န့ၣ်လီၤ.
လါမ့ၤ - SAC ခးလီၤကျိဖးဒိၣ်ဖဲ စံပၠီကရူၢ်ဒီးဘၣ်သံဝဲသဝီဖိတဂၤ
ဖဲလါမ့ၤ ၆ သီ, ၂၀၂၄ နံၣ်အနံၤ, ဂီၤခီ ၄း၂၀ ဒီး ၄း၅၂ အဆၢကတီၢ် SAC (အမတ) (နီၣ်ဂံၢ်-၃၁၀) ခးလီၤဝဲကျိဖးဒိၣ် ဟီၣ်ဝ့ၣ်စၢၣ် ၁၂၂ မမ (၃) ဖျၢၣ်ဆူ အဆ--- သဝီ, စံပၠီကရူၢ်ပူၤန့ၣ်လီၤ. ဖဲ ၄း၅၂ အဆၢကတီၢ်ကျိဖးဒိၣ်တဖျၢၣ် လီၤတဲာ်ပိၢ်ဖးထီၣ်ဖဲရီဘၢၣ်ကျီးဖဲ အဆ--- သဝီပူၤန့ၣ်လီၤ. ကျိဖးဒိၣ်ပိၢ်ဖးထီၣ်ဒီးဘၣ်သံဝဲ စီၤသ---, သးနံၣ်အိၣ်ဝဲ (၄၅) နံၣ်ဒီးအိၣ်ဖဲ အထ--- သဝီ, ပၠ့ကဒိကရူၢ်, ကၠဲၣ်ထိၤကီၢ်ဆၣ် ဖဲအဝဲလဲၤထုးထီၣ်ရီဘၢၣ်အဆၢကတီၢ်န့ၣ်လီၤ. စီၤသ---အံၤအိၣ်လၢအထ---သဝီဘၣ်ဆၣ်အ ဝဲဟဲမၤတၢ်ဖဲ အဆ---သဝီ, ရီဘၢၣ်ကျီးလၢကမၤစၢၤဝဲအဟံၣ်ဖိဃီဖိအဂီၢ်န့ၣ်လီၤ.
ညီနုၢ်ပှၤမၤတၢ်လၢရီဘၢၣ်ကျီးပူၤသ့ၣ်တဖၣ်ပၢၢ်ထီၣ်ဝဲလၢဂီၤခီဂီၤဂီၤ လၢကလဲၤထုးထီၣ်က့ၤဝဲရီဘၢၣ်လၢအကွးတ့ၢ်ဝဲန့ၣ်လီၤ. ကျိ ဖးဒိၣ်ဟီၣ်ဝ့ၣ်စၢၣ်တဖျၢၣ်လီၤတဲာ်ဘူးဒီးစီၤသ--- အယံၤကအိၣ်(၂၀) ခီၣ်ယီၣ် [၆.၀၉ မံးထၢၣ်] ဒီးဘၣ်ဒိဝဲအခီၣ်ညါသးလၢအ စ့ၣ်တကပၤ, အခီၣ်ဒုၣ်သၣ်ဒီးအခီၣ်နၢၣ်ခံန့ၣ်လီၤ. အဟၢဖၢစ့ၢ်ကီးဘၣ်ဒိဝဲဒိၣ်ဒိၣ်မုၢ်မုၢ်လၢကျိဖးဒိၣ်အက့သ့ၣ်တဖၣ်န့ၣ်လီၤ. အ ခီၣ်ဒုၣ်သၣ်အဖီလာ်ဘၣ်ဒိဝဲနးမး တုၤဒၣ်လဲာ်ဘူးကထီၣ်တဲာ်ကွံာ် ဒီးမ့ၢ်တၢ်လၢတၢ်လီၤဘၣ်ယိၣ်လၢအဂီၢ်အဃိ ကရူၢ်ခိၣ်နၢ် သ့ၣ်တဖၣ်လဲၤဆှၢအီၤတဘျီဃီဆူတၢ်ဟ့ၣ်ကသံၣ်ဒၢး လၢအဘူးဒီးဘၣ်တၢ်တီခိၣ်ရိၤမဲအီၤလၢ ကညီဆူၣ်ချ့မၤစၢၤဝဲၤကျိၤ (KDHW) ဖဲ စံပၠီကရူၢ်ပူၤနၣ်လီၤ. အသွံၣ်ယွၤလီၤဝဲအါမးဖဲတၢ်ဟ့ၣ်ကသံၣ်ဒၢးပူၤဘၣ်ဆၣ် ပှၤလၢကဟ့ၣ်အီၤသွံၣ်ဒီး မၤပှဲၤက့ၤအသွံၣ်န့ၣ်တအိၣ်ဘၣ်န့ၣ်လီၤ. ခီဖျိ SAC တဟ့ၣ်တၢ်ပျဲလၢပှၤကဘၣ်ဟးထီၣ်က့ၤလီၤတချုးဂီၤခီ ၆း၀၀ ဘၣ်အဃိ သဝီဖိသ့ၣ်တဖၣ်လဲၤဆှၢဝဲ ပှၤတူၢ်ဘၣ်တၢ်ဖိဆူတၢ်ဟ့ၣ်ကသံၣ်ဒၢးလၢအဘူးဒီးသ့ၤစရဲၣ် (သိမ်ဇရက်)ဝ့ၢ် တသ့ဘၣ်န့ၣ်လီၤ. သဝီဖိတဖၣ်ဘၣ်လဲၤဆှၢ က့ၤအီၤဆူတၢ်ဟ့ၣ်ကသံၣ်ဒၢးအဂၤတဖျၢၣ်ဖဲကၠီၣ်ဖၠၤကရူၢ်, ကၠဲၣ်ထိၤကီၢ်ဆၣ်လၢအဘၣ်တၢ်ဒုးအိၣ် ထီၣ်အီၤလၢဆူၣ်ချ့ပှၤမၤစၢၤတၢ်ဖိတဖၣ်န့ၣ်လီၤ. လၢခံဘၣ်တၢ်လဲၤဆၢက့ၤကဒီးအီၤဆူ (KDHW) တၢ်ဟ့ၣ်ကသံၣ်ဒၢးအသီ တဖျၢၣ်ဖဲ အဃ--- သဝီ, ဟးတရဲကရူၢ်, ဖၣ်အၣ်ကီၢ်ဆၣ်, ဒူသထူၣ်ကီၢ်ရ့ၣ်န့ၣ်လီၤ. အဝဲလဲၤတုၤဖဲအဃ---သဝီဖဲဟါလီၤခီ ၂း၀၀ အဆၢကတီၢ်ဒီးဒိးန့ၢ်ဘၣ်ဝဲတၢ်ကူစါယါဘျါန့ၣ်လီၤ. အဟၢဖၢဘၣ်ဒိဝဲနးမးန့ၣ်လီၤ. အပှံာ်ဖးဒိၣ်ဘၣ်ဒိဝဲဘူးထီၣ်လၢ ကထီၣ်တဲာ်ဘၣ်မးအသးန့ၣ်လီၤ. ခီဖျိအဝဲဘၣ်ဒိနးမးဒီးအသွံၣ်လီၤကွံာ်ဝဲအါမးအဃိ, အသးသမူဟးထီၣ်ကွံာ်ဖဲတၢ်ဟ့ၣ် ကသံၣ်ဒၢးန့ၣ်လီၤ.
စီၤသ---အစိၣ်ဘၣ်တၢ်ဟဲက့ၤစိာ်ကဒါက့ၤအီၤဆူအဟံၣ်ဒီးဘၣ်တၢ်ကုၢ်ထီၣ်ကွံာ်အစိၣ်ဖဲအထ---သဝီ, ပၠ့ကဒိကရူၢ်န့ၣ်လီၤ. စီၤသ--- အိၣ်ဒီးဟံၣ်ဖိဃီဖိ (၄) ဂၤ ဒီးလၢတၢ်ဃုကျိၣ်ဃုစ့တကပၤအဝဲသ့ၣ်ဘၣ်ဒိးသန့ၤထီၣ်အသးလၢအီၤန့ၣ်လီၤ. စီၤသ---အ ဟံၣ်ဖိဃီဖိဘၣ်ကွၢ်ဆၢၣ်မဲာ်ဒီးတၢ်ဂ့ၢ်ကီအါမးဖဲအဝဲသံဝံၤအလီၢ်ခံအဆၢကတီၢ်န့ၣ်လီၤ. ဖဲတၢ်ကဲထီၣ်သးဝံၤအလီၢ်ခံ, တမ့ၢ်တၢ် လၢအပူၤဖျဲးလၢပှၤကလဲၤထုးထီၣ်ရီဘၢၣ်လၢၤဘၣ်ခီဖျိ SAC ခးလီၤကျိဖးဒိၣ်အဃိန့ၣ်လီၤ. လၢတၢ်န့ၣ်အဃိပှၤမၤရီဘၢၣ်ဖိသ့ၣ် တဖၣ်ပတုာ်ကွံာ်ဝဲအတၢ်ဖံးတၢ်မၤဖဲအဆ---သဝီပူၤန့ၣ်လီၤ. ခီဖျိတၢ်ပှ့ၤတၢ်ကလံၤထီၣ်အဃိ, စီၤသ---အဟံၣ်ဖိဃီဖိဘၣ်ကွၢ် ဆၢၣ်မဲာ်ဒီးတၢ်ဂ့ၢ်ကီအါ မ့ၢ်လၢအဝဲသ့ၣ်အတၢ်ဟဲနုာ်တအိၣ်ထီဘိဒံးသိးလၢညါဘၣ်န့ၣ်လီၤ. စီၤသ---ဘၣ်ဒိဖဲလါမ့ၤ ၆ သီ, ၂၀၂၄ နံၣ်အနံၤ, ဂီၤခီ, ၄း၅၂ အဆၢကတီၢ်ဒီးသးသမူဟးထီၣ်ကွံာ်ဖဲ လါမ့ၤ ၇ သီ, ၂၀၂၄ နံၣ်အနံၤ, ဂီၤခီ ၈း၅ အဆၢကတီၢ်န့ၣ်လီၤ.
ဖဲ၂၀၂၄ နံၣ်အပူၤအါတက့ၢ် SAC ခးလီၤကျိဖးဒိအဃိဒူသဝီဖိသ့ၣ်တဖၣ်မံဝဲလၢဟံၣ်ပူၤတဘူၣ်လၢၤဘၣ်ဒီးအဝဲသ့ၣ်ဘၣ်မံဝဲလၢ တၢ်ပူၤန့ၣ်လီၤ. သဝီဖိပာ်ဖျါထီၣ်ဝဲလၢအဝဲသ့ၣ်နၢ်ဟူဝဲလၢ SAC ခးလီၤဝဲကျိဖးဒိၣ်ဒီးကျိဖိအဃိသဝီဖိသ့ၣ်တဖၣ်ဘၣ်အိၣ်ခူ သူၣ်လၢသဝီချၢတၢ်လီၢ်လၢအပူၤဖျဲးဒီးဘၣ်မံဝဲလၢဟါလီၤခီန့ၣ်လီၤ.
SAC အတၢ်မၤဃံးထီၣ်ဝဲတၢ်လဲၤတၢ်က့ၤဒီးတၢ်မၤအီၣ်ညၣ်အဃိဒုးအိၣ်ထီၣ်ဝဲတၢ်လုၢ်အီၣ်နီၢ်ခိသးသမူအတၢ်တၤတၢ်သ့ၣ်တဖၣ်
အါတက့ၢ်သဝီဖိလၢအအိၣ်ဖဲအဘ---သဝီ, ခရွဲကရူၢ်သ့ၣ်တဖၣ်ဒိးသန့ၤထီၣ်အသးလၢတၢ်မၤအီၣ်ညၣ် ဖဲညအ---ထံကျိလၢ တၢ်လုၢ်အီၣ်နီၢ်ခိသးသမူအဂီၢ်န့ၣ်လီၤ. ညီနုၢ်ပှၤသဝီဖိတဖၣ်မၤအီၣ်ညၣ်လၢမုၢ်နၤခါအဆၢကတီၢ်န့ၣ်လီၤ. ခီဖျိလၢ SAC ဒီး ဘၠူၤ စီထံသုးဖိတဖၣ်မၤဃံးထီၣ်တၢ်အဃိကဲထီၣ်က့ၤဝဲတၢ်ဘၣ်တံာ်တာ်လၢသဝီဖိသ့ၣ်တဖၣ်တၢ်လုၢ်အီၣ်နီၢ်ခိသးသမူအဂီၢ်န့ၣ်လီၤ. SAC ဒီးဘၠူၤစီထံသုးဖိတဖၣ်တပျဲချံနီတဘ့ၣ်လၢကဟးထီၣ်ဟးလီၤဖဲမုၢ်နၤခါအဆၢကတီၢ်ဘၣ်န့ၣ်လီၤ. အဝဲသ့ၣ်မ့ၢ်ထံၣ်ဝဲ ချံတဘ့ၣ်ဂ့ၤတဘ့ၣ်ဂ့ၤန့ၣ်ကခးဝဲမ့တမ့ၢ်ကဖီၣ်ဝဲသဝီဖိလၢအဒိးချံအံၤန့ၣ်လီၤ. ဖဲလါမးရှး ၂၀၂၄ နံၣ်, ပှၤမၤညၣ်ဖိ(၂) ဂၤဘၣ်တၢ်ဖီၣ်အီၤလၢ SAC ဒီးဘၠူၤစီထံသုးဖိတဖၣ်လၢအတဖိးသဲစးဘၣ်န့ၣ်လီၤ.
အါန့ၢ်အန့ၣ် SAC ဒိးလီၤဃာ်ဝဲမ့ၣ်ပိၢ်ဖဲညအ---ထံကျိကပၤအဃိသဝီဖိသ့ၣ်တဖၣ်ဘၣ်ကွၢ်ဆၢၣ်မဲာ်ဒီးတၢ်လုၢ်အီၣ်နီၢ်ခိတၢ်ဖံးတၢ် မၤသ့ၣ်တဖၣ်န့ၣ်လီၤ. အဝဲသ့ၣ်အိၣ်ဒီးတၢ်ကီတၢ်ခဲအါမးလၢကအိၣ်မူအိၣ်ဂဲၤအဂီၤဒီးပှၤဂ့ၢ်ဝီတၢ်ဆီၣ်ထွဲမၤစၢၤတၢ်ကရၢကရိ သ့ၣ်တဖၣ်လဲၤဝဲဖဲတၢ်လီၢ်ဖဲန့ၣ်တတုၤဒီးမၤစၢၤအဝဲသ့ၣ်တသ့ဘၣ်ခီဖျိတၢ်ဘံၣ်တၢ်ဘၢတအိၣ်ဘၣ်အဃိန့ၣ်လီၤ.
စးထီၣ်လၢတၢ်ကိၢ်ခါအဆၢကတီၢ်, သဝီဖိလၢအအိၣ်ဖဲခရွဲကရူၢ်ပူၤတဖၣ်မံဝဲလၢတၢ်ပူၤသ့ဂ့ၤဂ့ၤန့ၣ်လီၤ. ဘၣ်ဆၣ်စးထီၣ်ဖဲ လါယူၤတုၤဆူလါအီးကထိဘၢၣ် ၂၀၂၄ နံၣ် န့ၣ်မ့ၢ်တၢ်စူၤခါအဆၢကတီၢ်အဃိကဲထီၣ်ဝဲတၢ်ဂ့ၢ်ကီလၢသဝီဖိတဖၣ် ကမံဝဲလၢ တၢ်ပူၤအဂီၢ်ခီဖျိတၢ်စူၤဒီးထံထီၣ်လၢတၢ်ပူၤအဃိန့ၣ်လီၤ.