ပသးခုလၢ ပထုးထီၣ်ဘၣ်ကဒီးလံာ်တၢ်ကစီၣ်ပှဲၤထီၣ်ဝဲ ၂၅ ဝီတဝီန့ၣ်လီၤ. လံာ်တၢ်ကစီၣ်အံၤ ဘၣ်တၢ်ကွဲးအီၤတနံၣ်ခံဘျီ န့ၣ်လီၤ. လံာ်တၢ်ကစီၣ်လၢ အဘၣ်တၢ်ကွဲးအီၤခဲအံၤတဘ့ၣ်အံၤ ဘၣ်တၢ်ဟံးန့ၢ် တၢ်ဂ့ၢ်တၢ်ကျိၤ စးထီၣ်ဖဲလါမးရှး တုၤ လါအီကူး ၂ဝ၂၅ နံၣ် အပူၤန့ၣ်လီၤ. ဘၣ်ဆၣ်နကထံၣ်ဘၣ်တၢ်ဂ့ၢ်တၢ်ကျိၤ, တၢ်ကဲထီၣ်သးလၢအပူၤကွံာ်တနီၤ လၢဘၣ်တၢ်ကွဲးပာ်ဖျါအီၤအိၣ်ဝဲ မ့ၢ်လၢတၢ်ဂ့ၢ်တၢ်ကျိၤသ့ၣ်တဖၣ်အံၤ ဘၣ်တၢ်ဒိးန့ၢ်ဘၣ်အီၤလၢ ဃုလါအတီၢ်ပူၤအဆၢကတီၢ်ပူၤအဃိန့ၣ်လီၤ.

KHRG ပှၤဟီၣ်ခိၣ်ဖိခွဲးယာ်အလံာ်တၢ်ကစီၣ်တဘ့ၣ်အံၤ မ့ၢ်ဝဲဒၣ်တၢ်ကွဲးပာ်ဖှိၣ်တၢ်ကစီၣ်လၢအအိၣ်ဟဲလၢကညီကီၢ်ရ့ၣ်နွံဘ့ၣ်အပူၤဒီး လၢတၢ်ကွဲးတဖၣ်အကျါ တၢ်မၤဘၣ်ဒိပှၤဟီၣ်ခိၣ်ဖိခွဲးယာ်တခါစုာ်စုာ် အတၢ်ဂ့ၢ်ကီသ့ၣ်တဖၣ် လၢကီၢ်ရ့ၣ်ကိးဘ့ၣ်ဒဲးအပူၤ အိၣ်ဝဲဒၣ်ဒီး အတၢ်လီၤပလိာ်လိာ်အသး ဒီးတၢ်လီၤဆီလိာ်သး အိၣ်ဝဲအါမးအဂ့ၢ်န့ၣ် မ့ၢ်တၢ်လၢပကြၢးသ့ၣ်ညါဘၣ်စ့ၢ်ကီးန့ၣ်လီၤ.

လံာ်တၢ်ပာ်ဖျါတဘ့ၣ်အံၤအပူၤ ပာ်ဖျါထီၣ်ဝဲ SAC ပယီၤသုးကဘီယူၤဒီးဒြိခးလီၤတၢ်, တၢ်ကူၣ်ဘၣ်ကူၣ်သ့ဒီး တၢ်အိၣ်ဆူၣ်အိၣ်ချ့တၢ်အိၣ်သး, ဟီၣ်ခိၣ်ဒီဘ့ၣ်ပှၤမၤတၢ်ဖိကရၢ (ILO) စးထီၣ်သူဝဲအသဲစးတၢ်ဘျၢခိၣ်သ့ၣ် အဆၢဒိၣ် (၃၃) လၢပယီၤသုးမီၤစိရိၤအဖီခိၣ်, လီၢ်ကဝီၤကမျၢၢ်ဖိတဖၣ် ဘၣ်ကွၢ်ဆၢၣ်မဲာ်ဒီးဟီၣ်လာ်မ့ၣ်ပိၢ် တၢ်လီၤဘၣ်ယိၣ်တဖၣ်, သုးတၢ်ဟူးတၢ်ဂဲၤ, SAC ပယီၤသုးခးလီၤကျိဖးဒိၣ်အဃိကဲထီၣ် တၢ်သံတၢ်ပှၢ်, တၢ်ဘၣ်ဒိဘၣ်ထံး ဒီး တၢ်ဟးဂူာ်ဟးဂီၤ သ့ၣ်တဖၣ်အဂ့ၢ်န့ၣ်လီၤ.

လၢခံကတၢၢ် ပနာ်လၢပှၤဖးလံာ်ဖိသ့ၣ်တဖၣ် ကသ့ၣ်ညါအါထီၣ်ဘၣ်တၢ်မၤဘၣ်ဒိပှၤဟီၣ်ခိၣ်ဖိခွဲးယာ် အတၢ်အိၣ်သးလၢ ကီၢ်ပယီၤမုၢ်ထီၣ်ကလံၤထံးအပူၤဒီး ပနာ်စ့ၢ်ကီးလၢပှၤဖးလံာ်ဖိသ့ၣ်တဖၣ် ကပလၢၢ်ဘၣ်ဝဲ သဝီဖိလၢအအိၣ်လၢကီၢ်ရ့ၣ်တဘ့ၣ်စုာ်စုာ်အပူၤအတၢ်တူၢ်ဘၣ်သ့ၣ်တဖၣ်န့ၣ်လီၤ.